Komiteti Shqiptar i Helsinkit (KShH) vlerëson dhe inkurajon përpjekjet për angazhimin në intensifikimin e luftës së koordinuar të Policisë së Shtetit, kundër prodhimit dhe trafikimit të lëndëve narkotike si dhe pastrimin e të inflirtuarve nga rradhët e punonjësve të policisë.
KShH në konsultim me shtetasit dhe në mbështetje të disa të dhënave të pjesshme shpreh shqetësimin se vitet e fundit nuk po tregohet vëmendja e duhur në drejtim të parandalimit të nxënësve apo studentëve që ndjekin arsimin pranë institucioneve përkatëse apo të rinjve në përgjithësi, të cilët janë më së shumti viktimë e përdorimit të lëndëve narkotike. Format e futjes së drogave në Institucionet e Arsimit Parauniversitar dhe Universitar, qoftë edhe në masë të vogël kanë efekte jashtëzakonisht të dëmshme.
KShH i sugjeron organeve të policisë që për problemin e mësipërm të tregojë vëmendje të veçantë dhe në vazhdimësi, sepse mungesa e konseguencës së marrjes së masave dhe ndjekjes së situatës nga afër apo kufizimi vetëm në denoncimet përkatëse, mendojmë se nuk do ti shërbente parandalimit.
Për KShH-në problemi ka ndjeshmëri të lartë dhe pasoja të dëmshme dhe kërkon marrjen e masave jo vetëm kur ndodh diçka, por edhe një koordinim më të mirë dhe sensibilizim me synim edukimin e brezit të ri që të mos mashtrohet dhe të bjerë pre e personave të implikuar në këtë veprimtari kriminale. Në këtë drejtim, KShH sugjeron forcimin e bashkëpunimit mes organeve të policisë, prindërve dhe mësuesve/drejtuesve të Institucioneve Arsimore, për të sinjalizuar çdo rast të shpërndarjes së lëndëve narkotike dhe për të koordinuar marrjen e masave parandaluese
Për KShH-në bashkëpunimi me pindërit dhe të afërmit si dhe më shoqërinë civile është gjithashtu e nevojshme. Prindërit u kanë besuar mësuesve dhe drejtorëvë të institucioneve arsimore edukimin e fëmijëve të tyre. Këto institucione kanë përgjegjësi për të mbrojtur të rinjtë nga ky fenomen, në mënyrë të veçantë gjatë periudhës së mësimit. Ato duhet të transmetojnë tek brezi i ri vlerat e një shoqërie me virtyte të larta etiko-morale dhe profesionale.
KShH mendon gjithashtu se duhen vlerësuar edhe shqetësimit apo të dhënat që japin organizatat ndërkombëtare lidhur me prodhimin dhe trafikimin e lëndëve narkotike në Shqipëri, siç është edhe evidentimi i këtij problemi në raportin e CIA-s, publikuar në media ditët e fundit.
