Komiteti Shqiptar i Helsinkit është i angazhuar të kontribuojë në mbrojtjen e të drejtave të punonjësve të medias, respektimi i të cilave është garanci për të pasur një media të lirë e të pavarur. Gazetarët gëzojnë jo vetëm të drejtën e lirisë së shprehjes, por edhe të drejtën për punësim, kushte të duhura në punë, mbrojtje nga censura dhe vetëcensura, mbrojtje nga diskriminimi, mbrojtje nga sulmet fizike apo verbale, etj. Në rast të proceseve gjyqësore, atyre duhet t’u garantohet akses efektiv në organet e drejtësisë dhe një proces i drejtë e i paanshëm.
Shqipëria, sipas indeksit botëror të lirisë së shtypit të publikuar ditën e sotme (3 Maj 2023) nga Reporterët pa Kufij, pavarësisht se është ngjitur me shtatë vende, nga vendi 103 (vitin e kaluar) në vendin e 96 (këtë vit), sërisht mbetet vendi i fundit i renditur në Ballkanin Perëndimor (nga 6) dhe i dyti në të fundit në Evropë (nga 40 vende në zonën Bashkim Evropian -Ballkan). Rezultati i Shqipërisë nuk është rritur ndjeshëm sipas kësaj organizate, gjë që tregon se ngjitja me 7 vende mund t’i atribuohet pjesërisht rënies së lirisë së medias në vende të tjera të botës.
Sa i përket mjedisit politik, sulmet verbale ndaj gazetarëve ishin problem veçanërisht në pjesën e parë të vitit. Por gazetarët vazhdojnë të jenë të shqetësuar për ndikimin negativ të centralizimit të fundit të komunikimit të qeverisë dhe partisë që ka mazhorancën qeverisëse. Në shtator të vitit të kaluar, prokuroria kufizoi në mënyrë disproporcionale mbulimin mediatik të një sulmi kibernetik kundër institucioneve shqiptare. Tërheqja e nëntorit ndaj “paketës anti-shpifje” nga axhenda parlamentare ishte pozitive për lirinë e medias. Sa i përket sigurisë së gazetarëve, në vitin 2022 ka pasur më shumë sulme ndaj gazetarëve se në vitin 2021, por policia perceptohet se po bën përpjekje për të hetuar me shpejtësi sulmet ndaj gazetarëve dhe po zbatojnë masa disiplinore për rastet që përfshijnë oficerë të zbatimit të ligjit.
Komiteti Shqiptar i Helsinkit nxit aktorët e shoqërisë civile të reagojnë në rast të shkeljes së të drejtave të gazetarëve, ndërkohë që shpreh gatishmërinë për të ofruar ndihmë ligjore falas ndaj punonjësve të medias që përballen me shkelje në ambientin e tyre të punës.
Ky material realizohet në kuadër të zbatimit të projektit që Komiteti Shqiptar i Helsinkit në bashkëpunim me Qendrën Kosovare për Rehabilitimin e Viktimave të Torturës, Komiteti i Helsinkit në Serbi, Komiteti i Helsinkit në Maqedoni, Komitetit i Helsinkit në Bosnjë Hercegovinë po zbaton mbi “Sfidimi i tkurrjes së hapësirave të shoqërisë civile në Ballkanin Perëndimor” mbështetur nga Austausch e.V. dhe Civic Solidarity Platform .
