Komiteti Shqiptar i Helsinkit (KShH) me asistencën e ekspertëve ndërkombëtarë të fushës, Dr. Rainer Deville dhe ekspertëve të Shoqatës së Prokurorëve Serbë, i është drejtuar dy organeve të Vettingut me opinion për përmirësimin e rregulloreve të tyre. Ekspertët kanë vërejtur nevojën për disa përmirësime për çështje të natyrës parimore ashtu edhe teknike në rregulloren “Për veprimtarinë e Kolegjit të Apelimit të Gjykatës Kushtetuese” dhe në rregulloren “Për procedurat e zhvillimit të shortit në Komisionin e Pavarur të Kualifikimit”.
Mbivendosja ose përsëritja e panevojshme e rregullave në aktet nënlgijore (rregulloret), shmangia e paqartësive ose keqinterpretimeve janë disa nga çështjet që nevojiten të saktësohen në rregulloret e miratuara të këtyre organeve, me qëllim që ato të mos bëhen shkak për cënim në mënyrë të tërthortë, të objektivave dhe parimeve të procesit të Vettingut.
Me ndihmën e ekspertëve ndërkombëtarë, KShH po vijon punën për konsultimin e dy akteve të tjera nënligjore të ligjit të vettingut, përkatësisht të Rregullores për Veprimtarinë e Komisionit të Pavarur të Kualifikimit dhe rregullave mbi testimin profesional që organizohet nga Shkolla e Magjistraturës.
Këto propozime vijnë në kuadër të nismës “Për të rritur transparencën, gjithëpërfshirjen dhe përgjegjshmërinë në procesin e Vettingut”, mbështetur nga Fondacioni Shoqëria e Hapur për Shqipërinë (OSFA). KShH dhe OSFA angazhuar në përmbushjen e një nga objektivave të kësaj nisme, për përmirësimin e akteve nënligjore të ligjit të Vettingut.
