Në kuadër të zbatimit të Projektit “Për një transparencë dhe pjesëmarrje më të lartë të grupeve të interesit në proceset politikëbërëse dhe vendimmarrëse të organeve publike”, Komiteti Shqiptar i Helsinkit (KShH) ka kërkuar informacion zyrtar nga institucionet qendrore të shtetit si Kryeministria dhe Ministritë lidhur me zbatimin e Ligjit nr. 146/2014 “Për njoftimin dhe konsultimin publik”, për sa i takon njoftimit dhe konsultimit publik të projekt-akteve (projekt-ligjet, projekt-strategji, etj). Ky projekt përbën një nismë që kontribuon drejtpërsëdrejti në promovimin e demokracisë përfaqësuese dhe qeverisjen e hapur.
Megjithë mangësitë e konstatuara për sa i takon proçesit të njoftimit dhe konsultimit publik të projekt-akteve, institucionet shtetërore, në pjesën më të madhe iu përgjigjën kërkesës për informacion të KShH. Për institucionet që nuk u përgjigjën apo dhanë një përgjigje të pjesshme, bazuar në Ligjin nr. 119/2014, “Për të drejtën e informimit”, KShH paraqiti ankim administrativ pranë Komisionerit për të Drejtën e Informimit dhe Mbrojtjen e të Dhënave Personale.
Në vijim të shqyrtimit të tyre, me Vendimet nr. 2 dhe nr 3, dt. 25.01.2017, Komisoneri pranoi dy nga ankimet, si dhe urdhëroi institucionet përgjegjëse shtetërore, respektivisht, Ministrinë e Drejtësisë dhe Ministrinë e Punëve të Jashtme, të vënë në dispozicion dokumentacionin e kërkuar nga KShH brenda një afati kohor të shkurtër.
KShH do të ushtrojë të gjitha mënyrat ligjore për të nxitur dhe siguruar që institucionet shtetërore realizojnë proçese vendimmarrëse transparente dhe të efektshme, në zbatim të detyrimeve ligjore për konsultimin publik të projekt-akteve, si dhe për informimin e grupeve të interesit.
KShH falënderon Fondacionin Shoqëria e Hapur për Shqipërinë (OSFA), për mbështetjen financiare të këtij projekti.
