Gjatë monitorimit të vazhdueshëm të të drejtave të personave të burgosur, Komiteti Shqiptar të Helsinkit (KShH) ka konstatuar shtetas të dënuar me burgim të cilët vuajnë nga sëmundje shumë të rënda por që nuk marrin kujdesin e duhur shëndetësor nga administrata e burgjeve.

KShH ka verifikuar rastin e një shtetasi të dënuar me burgim i cili vuan nga sëmundja “Sklerozë multiple”, sëmundje që i ka shkaktuar paralizim nga këmbët deri në pjesën e mesit të trupit dhe që shoqërohet me dhimbje të forta. Për shkak të papajtueshmërisë së gjëndjes shëndetësore me burgimin, së fundi, ky shtetas i është drejtuar Gjykatës Europiane për të Drejtat e Njeriut me kërkesë për lirim nga burgu.

KShH, i cili ka ndjekur në vazhdimësi situatën e këtij shtetasi, ka paraqitur në dt. 7 shkurt 2018, një opinion si Palë e Tretë (amicus curiae) ku ka pasqyruar të dhëna konkrete të lidhura me çështjen në fjalë dhe mbi kushtet e trajtimit të personave të burgosur në burgun ku ndodhet shtetasi.
Me anë të opinioni, KShH synon të informojë Gjykatën me qëllim shqyrtimin e gjithanshëm të problematikës dhe dhënien e një vendimi të drejtë që garanton standartet më të mira të respektimit të të drejtave të njeriut për këtë shtetas.

Kjo ndërhyrje është mundësuar në kuadër të Projektit “Të litigojmë në mënyrë strategjike për mbrojtje efektive të të drejtave në fushën e shëndetit”, mbështetur nga Fondacioni “Shoqëria e Hapur për Shqipërinë”.