Komiteti Shqiptar i Helsinkit mbështet dhe përshëndet investigimin e “Fiks Fare” për sigurinë ushqimore.
KShH, e shikon të nevojshme të theksojë faktin se nuk është e para herë që produkte ushqimore kanë rezultuar jashtë standarteve, por mendon se ky problem nuk është ndjekur gjer në fund. Konkretisht publiku nuk është i informuar se çfarë ndikimi ka patur apo mund të kishte për shëndetin e njerëzve vënia në shitje e produkteve ushqimore të skaduara ose të cilësisë së dobët. Në disa raste publiku është njoftuar për ndonjë bllokim të këtyre produkteve apo për gjobitjen në rrugë administrative. Ka patur raste që problemi është konsideruar i përfunduar ose i mbyllur dhe nuk është ndjekur më tej se ku e ka burimin ky mashtrim në dëm të shëndetit dhe të jetës së njerëzve dhe çfarë masa konkrete janë marrë për parandalimin e këtij fenomeni?
KShH mendon se ky mashtrim që kryhet në forma të ndryshme, por gjithmonë për interesa dhe përfitime të ngushta, kërkon ndërhyrje, kontrolle dhe masa të rrepta. Veprimet mashtruese të personit apo të një grupi personash që shumëzojnë me zero dëmin shëndetësor që mund tu shkaktohet jo një por shumë shetasve, bie ndesh me nenin 59 të Kushtetutës ku thuhet se: “Shteti brenda kompetencave kushtetuese dhe mjeteve që disponon dhe në plotësim të nismës dhe të përgjegjësive private, synon standartin më të lartë shëndetësor”. Element i rëndësishëm i këtij standarti është edhe siguria ushqimore. KShH e shikon të nevojshme të evidentojë jo thjesht investigimin e kryer nga “Fiks Fare” për një apo dy produkte, por edhe për mjaft produkte të tjera që konsumohen çdo ditë dhe që vihet në dyshim cilësia e tyre.
Ka akte ligjore si dhe akte ndërkombëtare që përcaktojnë rregulla të qarta për sigurimin e ushqimit, të ushtrimit të kontrolleve dhe vënies para përgjegjësisë të fajtorëve.
Mjafton të përmendim ligjin e datës 28.01.2008 “Për ushqimin”, Vendimin e K.M datë 21.10.2009 “Për organizimin dhe funksionimin e autoritetit kombëtar të ushqimit” ligjin e datës 16.06.2011 “Për inspektim në Republikën e Shqipërisë” etj.
KShH u bën thirrje organeve kompetente që të mos kufizohen vetëm në kontrollet sporadike dhe marrjen e masave të natyrës administrative, por kur ka dyshime të arsyeshme dhe të bazuara që vërtetohen edhe me analiza laboratorike, të mos hezitojnë që ti denoncojnë ato për procedim penal. Në kuadrin e transparencës lidhur me këtë çështje publiku kërkon të informohet jo vetëm për rezultatin e kontrolleve, por edhe për masat efektive që merren për sigurimin e shëndetit si dhe parandalimin e rasteve të tilla.
