Më datë 19 Tetor 2018, Komiteti Shqiptar i Helsinkit (KShH) i është drejtuar Komisionerit për Mbrojtjen nga Diskriminimi, nëpërmjet një ankese me objekt: Mbi diskriminimin e personave me masë mjekësore, “Mjekim i detyruar në një institucion mjekësor” dhe pacientëve me masë sigurimi “Shtrim i përkohshëm në një spital psikiatrik”, të akomoduar në mënyrë të paligjshme në institucionet me natyrë penitenciare.
Bazuar në mbrojtjen ligjore që ofron kuadri ynë ligjor në nivel konventor por edhe legjislacioni i brendshëm, referuar të gjitha fakteve, argumentave ligjore, raporteve të monitorimit të KShH-së, raporteve dhe rekomandimeve të Avokatit të Popullit dhe CPT-së, KShH vlerëson se personat ndaj të cilëve Gjykata ka vendosur masën e sigurimit “Shtrim i përkohshëm në një spital psikiatrik” dhe/ose masën mjekësore “Mjekim i detyruar në një institucion mjekësor”, janë akomoduar në shkelje flagrante të ligjit dhe diskriminohen në raport me pacientët me të njëjtat diagnoza, që kurohen dhe ndiqen në spitalet psikiatrike të sektorit publik.
Ky reagim institucional u realizua në kuadër të nismës “Të litigojmë në mënyrë strategjike për mbrojtje efektive të të drejtave në fushën e Shëndetit”, mbështetur financiarisht nga Fondacioni “Shoqëria e Hapur për Shqipërinë”.
