Komiteti Shqiptar i Helsinkit (KShH), në sajë të sinjalizimeve të medias investigative, ka monitoruar dhe ofruar asistencë ligjore për çështjen e diskriminimit për shkak të gjendjes ekonomike dhe sociale të shtetasve që banojnë pranë ish-Kampit të Torovicës, Njësia Administrative Balldre, Bashkia Lezhë.
Pas evidentimit të problematikës shqetësuese me të cilën përballeshin 15 familjet që jetonin në ndërtesën e ish-Kampit, KShH siguroi pëlqimin e 3 prej banorëve për përfaqësimin e çështjes së tyre në rrugë ligjore. Këta banorë jetonin në kushte tepër të rënduara dhe të mjerueshme në godinën që dikur kish shërbyer si kamp i të burgosurve në Torovicë.
KShH ofroi asistencë ligjore dhe përfaqësoi banorët pranë Komisionerit për Mbrojtjen nga Diskriminimi, i cili e pranoi ankesën e banorëve me vendimin nr.116, dt.04.05.2018. Komisioneri vërejti diskriminimin e banorëve për shkak të gjendjes ekonomike dhe sociale të tyre, nga Strukturat e Bashkisë Lezhë. Gjithashtu, Komisioneri urdhëroi marrjen e masave të menjëhershme nga ana e Bashkisë Lezhë, për sigurimin e ujit të pijshëm, kontenierëve të mbetjeve urbane, për gjetjen e zgjidhjeve alternative për strehim dhe permirësimin e infrastrukturës rrugore, për banorët e ish-kampit të të burgosurve Torovicë, brenda 30-ditëve nga vënia në dispozicion e vendimit.
Zgjidhja e përkohshme e situatës infrastrukturore nëpërmjet mirëmbajtjes me çakull të segmentit rrugor prej 500 m, që lidh qendrën e fshatit Marlecaj me ish-kampin e Torovicës, largësia e konsiderueshme nga banesat e ankuesve tek kontenierët e mbetjeve urbane, mungesa e ndonjë projekti/plani nga Bashkia Lezhë për furnizimin me ujë të pijshëm të familjeve, si dhe mungesa e projekteve/planeve apo masave që ka marrë apo do të ndërmarrë për përmirësimin e kushteve të jetesës dhe gjetjen e një zgjidhje alternative për strehimin në kushte sa më dinjitoze të banorëve të ish-kampit Torovocë, janë disa nga shkeljet që Komisioneri ka evidentuar në vendimin për mbrojtjen e banorëve nga diskriminimi. Mospërmbushja e detyrimeve ligjore nga ana e Bashkisë Lezhë, ka vendosur në pozita të pabarabarta ankuesit me banorë të tjerë të kësaj njësie administrative, për të cilët janë marrë masa për përmirësimin e kushteve të jetesës. Pritet që Bashkia Lezhë, brenda 30 ditëve të informojë Komisionerin për masat e ndërmarra në drejtim të respektimit të të drejtave të mohuara.
Kjo çështje është ndjekur në kuadër të Projektit “Krijimi dhe promovimi i praktikave pozitive të mirëqeverisjes ndaj komuniteteve lokale dhe grupeve vulnerabël në Shqipëri”, të mbështetur financiarisht nga Programi i Granteve të Vogla i Komisionit për Demokraci i Ambasadës së SH.B.A.-së në Tiranë”
