Më datë 27 Janar 2017 Komiteti Shqiptar i Helsinkit (KShH) në kuadër të zbatimit të projektit “Për një transparencë dhe pjesëmarrje më të lartë të grupeve të interesit në proceset politikëbërëse dhe vendimmarrëse të organeve publike” të mbështetur financiarisht nga Fondacioni Shoqëria e Hapur për Shqipërinë, organizoi një sesion informues me pedagogë e studentë të Fakultetit të Drejtësisë. të Universitetit të Tiranës.
Përfaqësues të KShH-së Znj. Erida Skëndaj, Drejtore Ekzekutive e KShH-së, Z. Niazi Jaho, Këshilltar Ligjor pranë KShH-së dhe Znj. Klejda Ngjela, Menaxhere Projektesh ofruan kontributin e tyre në drejtim të njohjes së pjesëmarrësve me risitë e ligjit Nr. 146/2014 “Për njoftimin dhe konsultimin publik”, si dhe për procedurat e njoftimit dhe konsultimit publik. Forumin e përshëndeti edhe Dekani i Fkultetit të Drejtësië, Z. Artan Hoxha.
KShH do të ofrojë asistencë ligjore për grupet e interesit në zbatim të ligjit të mësipërm, lidhur me marrjen dhe përcjelljen e informacioneve për planet vjetore të 19 Ministrive sa i takon procesit vendimmarrës.
Pjesëmarrësit u ndalën në diskutimin e problematikave të evidentuara nga KShH, mos konsultimi i të gjithë projekt-akteve sipas procedurës që parashikon ligji, mungesa e transparencës nga organet publike, etj.. Ndër të tjera, u evidentua rëndësia e ndërgjegjësimit për të kërkuar të drejtat që burojnë nga Ligji Nr. 146/2014 “Për njoftimin dhe konsultimin publik”, lobim dhe advokim i përbashkët pranë institucioneve të administratës publike.
KShH do të vazhdojë të kontribuojë për një përfshirje sa më të gjerë të subjekteve të interesuara në proceset e njoftimit dhe konsultimit publik.
Ky aktivitet realizohet në kuadër të projektit “Për një transparencë dhe pjesëmarrje më të lartë të grupeve të interesit në proceset politikëbërëse dhe vendimmarrëse të organeve publike” të mbështetur financiarisht nga Fondacioni Shoqëria e Hapur për Shqipërinë.
