Në 5 tetor 2020, Kuvendi i Republikës së Shqipërisë miratoi Projektligjin “Për disa shtesa dhe ndryshime në Kodin Zgjedhor”. Midis dispozitave të ndryshuara është dhe pika 3 e nenit 67 të Kodit Zgjedhor që lejon Kryetarin e partisë apo të partisë udhëheqëse të koalicionit që në zgjedhjet për Kuvendin të regjistrohet deri në katër zona zgjedhore.
Në datën 13 tetor 2020, Komiteti Shqiptar i Helsinkit (KShH) reagoi publikisht kundër këtij përjashtimi ligjor, me arsyetimin se ky ndryshim binte ndesh me parimin e barazisë dhe të mosdiskriminimit si dhe me standartet e sanksionuara në disa dokumente ndërkombëtare.
Në opinionin e fundit të Komisionit të Venecias, veç të tjerave, trajtohet edhe përmbajtja e nenit 67 pika 3 e Kodit Zgjedhor që përmendëm më lart. Në të thuhet se përjashtimi që bëhet në këtë nen bie ndesh me parimin e votimit të barabartë dhe të mosdiskriminimit. Por, meqë ndryshimet e miratuara në Kodin Zgjedhor nuk rekomandohet të rishikohen para zgjedhjeve të 25 prillit 2021, Komisioni i Venecias shpreh opinionin që liderët e partive politike të përmbahen nga të qenët kandidat në shumë zona elektorale.
Në këtë vështrim, KShH sugjeron që edhe pse përjashtimi i mësipërm i parashikuar në nenin 67 pika 3 të Kodit Zgjedhor është në fuqi, kryetarët e partive dhe kryetarët e partive udhëheqëse të koalicionit (të regjistruar në KQZ si subjekte zgjedhore) të kandidojnë vetëm në një zonë zgjedhore.
Vetë shprehja “mund të regjistrohet” që është formuluar në dispozitën e mësipërme, mendojmë se e bën plotësisht të realizueshëm sugjerimin e KShH-së.
