Në vijim të krijimit dhe konsolidimit të praktikave për përfaqësimin e rasteve të cënimit të së drejtës për njoftim dhe konsultim publik, Komiteti Shqiptar i Helsinkit (KShH) ka vënë në lëvizje Komisionerin për të Drejtën e Informimit dhe Mbrojtjen e të Dhënave Personale (Komisioneri) për një tjetër projektakt të miratuar nga Këshilli i Ministrave.
KShH paraqiti një ankesë tek Komisioneri për mosrespektimin e së drejtës për njoftim dhe konsultim publik për projektligjin “Për strehimin social”. Nisma për hartimin e këtij ligji u ndërmor nga Ministria e Zhvillimit Urban, e cila zhvilloi një proces konsultimi, i cili nuk ishte në zbatim të detyrimeve të parashikuara në ligjin nr.146/2014 “Për njoftimin dhe konsultimin publik”. Në këtë vendim të radhës, Komisioneri i jep prioritet, publikimit të projektaktit në regjistrin Elektronik për Njoftimet dhe Konsultimet Publike, si masë parësore për realizimin e një njoftimi dhe konsultimi efektiv. Mosrespektimi i kësaj mase prioritare nga Ministria e Zhvillimit Urban për projektligjin “Për strehimin social”, është vlerësuar nga Komisioneri, në shkelje të nenit 6 të ligjit nr.146/2014 “Për njoftimin dhe konsultimin publik”.
KShH i bën thirrje të gjitha grupeve të interesit t’i drejtohen Komisionerit, në rast se e drejta e tyre për njoftim dhe konsultim publik do të cënohet. Në këtë mënyrë do të rritet efikasiteti për zbatimin e këtij ligji shumë të rëndësishëm për procesin e konsultimit.
KShH falënderon Fondacionin Shoqëria e Hapur për Shqipërinë (OSFA), për mbështetjen financiare të nismës “Për një transparencë dhe pjesëmarrje më të lartë të grupeve të interesit në proceset politikbërëse dhe vendimmarrëse të organeve publike”.
