Për korrespondent në qarkun e Kukësit

Komiteti Shqiptar i Helsinkit po zbaton nismën “Unë marr pjesë! Zëri im, vota ime vlen.”, në partneritet me Civil Rights Defenders dhe Instituti i Studimeve Politike, mbështetur financiarisht nga Bashkimi Europian.

Projekti ka për synim të fuqizojë qytetarët dhe shoqërinë civile që të angazhohen në promovimin, advokimin dhe monitorimin e proceseve demokratike. Ndër aktivitetet kryesore të nismës është monitorimi i procesit zgjedhor, i cili shtrihet në 9 qarqe të Republikës së Shqipërisë. Në kuadër të monitorimit, KShH hap thirrjen publike për korrespondent lokal për qarkun e Kukësit.

Korrespondenti lokal angazhohet në zhvillimin e monitorimit të procesit zgjedhor në qytetin përkatës dhe merr përsipër përpilimin e raporteve dhe sinjalizimin pranë KShH-së të situatave për të cilat është e nevojshme kryerja e një misioni verifikimi. Gjithashtu, korrespondenti lokal do të angazhohet në referimin dhe koordinimin e vëzhguesve që do të angazhohen në monitorimin e ditës së votimit dhe numërimit, duke marrë përsipër mbledhjen e dokumentave, përfshirë këtu dhe pyetësorët e plotësuar gjatë monitorimeve. Gjatë përmbushjes së përgjegjësive, korrespondenti duhet të veprojë brenda standarteve të profesionalizmit, objektivitetit dhe paanshmërisë.

KShH mirëpret aplikime nga të interesuarit që përmbushin kriteret e mëposhtëm:

Kritere individuale:

• Të jenë politikisht të pavarur dhe të paanshëm;
• Të gëzojnë integritet profesional dhe moral;
• Të kenë aftësi të mira analitike dhe mendimi kritik.

Aftësi profesionale:

• Të kenë përvojë të mëparshme angazhimi në shoqërinë civile;
• Të menaxhojnë mirë afatet kohore sipas udhëzimeve të stafit zbatues të projektit;
• Të jenë të aftë të punojnë nën presionin e kohës;
• Të kenë aftësi të mira menaxhimi të grupeve të individëve;
• Të hartojnë në mënyrë cilësore dhe profesionale raportet e monitorimit;
• Të jenë njohës dhe përdorues të mirë të produkteve bazë të kompjuterit.

Angazhimi si korrespondent lokal do të shtrihet në përputhje me kohëzgjatjen e nismës “Unë marr pjesë! Zëri im, vota ime vlen.” me mundësi rishikimi të bashkëpunimit të mëtejshëm në nisma të tjera.

KShH fton të interesuarit të dërgojnë në formë elektronike në adresën e email-it office@ahc.org.al CV dhe letër motivimi deri në datën 19 shkurt 2021.