PËR LABORATORIN E PARË TË TË DREJTAVE TË NJERIUT NË VEND THIRRJE PËR APLIKIM PËR TË PËRZGJEDHUR 6 STUDENTË TË FAKULTETEVE TË DREJTËSISË Komiteti Shqiptar i Helsinkit (KSHH), në kuadër të nismës “Jo Korrupsionit, Po Demokracisë”, mbështetur financiarisht nga Agjencia Suedeze për Bashkëpunim Ndërkombëtar për Zhvillim (SIDA), nismë e cila synon fuqizimin e sektorit të shoqërisë civile si aktorët kryesorë të luftës kundër korrupsionit dhe zhvillimin e demokracisë dhe shtetit të së drejtës, nëpërmjet presionit pozitiv ndaj autoriteteve publikeNë kuadër të kësaj iniciative, KShH kërkon të angazhojë 6 studentë të Fakultetit të Drejtësisë për të kontribuar me idetë dhe njohuritë e tyre në Laboratorin e Parë të të Drejtave dhe Lirive të Njeriut në vendin tonë, i cili do të ngrihet nga Komiteti Shqiptar i Helsinkit, me ekspertizën e Universitetit Amerikan të Minesotës, ekspertëve të të drejtave të njeriut pjesë e stafit të KShH-së, si dhe kontributin e 4 organizatave partnere pjesë e kësaj nisme: Qendra Europiane, Shoqata Internacionale për Solidaritetin, Gruaja në Zhvillim Korcë dhe Qendra për Progres Rinor, Kukës.
Laboratori është konceptuar në tre faza që konsistojnë në ideimin, eksperimentimin dhe veprimin për gjetjen e zgjidhjeve të qëndrueshme për kauza të rëndësishme që lidhen me situatën e të drejtave dhe lirive të njeriut në vendin tonë. Për këtë angazhim, studentët do të paguhen në mënyrë modeste, ndërkohë që pritet të japin kontributin e tyre në disa drejtime si vijon:
- Pjesëmarrja me kontribute aktive në diskutime në Workshop-et dhe eventet debatuese me në fokus çështjet e antikorrupsionit, pjesëmarrja e qytetarëve në politikëbërje dhe sundimi i ligjit, të drejtat e njeriut dhe mbrojtja e grupeve vulnerabël, etj. (25-29 Shtator)
- Pjesëmarrja në diskutimet e realizuara mbi këto tematika me qëllim shkëmbimin e mendimeve mbi sfidat që OShC hasin në ushtrim të aktivitetit dhe angazhimit të tyre si dhe dhënies së ideve se si organizatat mund të angazhohen në kauza të rëndësishme me interes publik për të drejtat dhe liritë e njeriut në shqipëri në Shqipëri.
- Nën udhëheqjen e ekspertëve të angazhuar, do të ndihmojnë 4 organizatat partnere të KSHH-së në ndërmarrjen e veprimeve të advokacisë, angazhimit civil dhe lobimit në adresimin e zgjidhjeve potenciale për 4 kauza që kanë interes publik në fushën e të drejtave të njeriut (me anë të monitorimeve, fillimit të litigimit strategjik, përgatitjes së dokumentave politikë apo kërkimorë, të cilat do të shërbejnë për të ushtruar presion pozitiv ndaj institucioneve në funksion të ndryshimeve pozitive në legjislacion, politika, ndryshime institucionale, etj).
KShH inkurajon aplikimet nga kandidatë, të cilët janë të interesuar për t’u angazhuar në këtë proces dhe plotësojnë këto kritere të aftësisë individuale, edukimit dhe aftësisë profesionale në vijim:
Edukimi dhe aftësitë profesionale
- Të jetë duke ndjekur vitin e tretë të studimeve në nivelin Bachelor ose studimet në nivelin Master, dega Drejtësi.
- Të kenë mesatare të studimeve mbi 8.0.
- Të njohë mirë anglishten dhe të jetë përdorues shumë i mirë i programeve bazë të kompjuterit.
- Aftësi të mira në kërkim shkencor dhe për të prodhuar dokumente kërkimore me cilësi të lartë
Aftësitë individuale
- Aftësi të shkëlqyera komunikimi;
- Aftësitë e punës në grup, kapaciteti për t’iu përgjigjur pozitivisht reagimeve kritike dhe një qasje e orientuar nga konsensusi ndaj punës.
- Aftësi për të punuar në mënyrë të pavarur, të paanshme dhe me integritet;
- Të ketë aftësi të gjera analitike, kërkimore dhe të menduarit kritik;
- Të jetë përgjegjës për respektimin e detyrave dhe afateve të përcaktuara;
KShH inkurajon studentët e interesuar që të dërgojnë në formë elektronike në adresën e e-mailit të KShH-së office@ahc.org.al deri në datën 13.09.2023 dokumentacionin e mëposhtëm në formë të detyrueshme:
- CV (Curriculum Vitae);
- Ofertë finaciare.
- Dy letra rekomandimi nga pedagogët e tyre
Si dhe në formë fakultative
1. Punime të ngjashme të realizuara më parë/dokumente të tjera relevante
Me konsideratë,
Komiteti Shqiptar i Helsinkit
