Komiteti Shqiptar i Helsinkit (KShH), në kuadër të nismës “Promovimi i mirëkuptimit, tolerancës dhe lirisë fetare në Shqipëri”, i cili mbështetet nga Ambasada e Mbretërisë së Vendeve të Ulëta në Shqipëri, shpall thirrjen publike për ekspert për studimin që KShH do të realizojë mbi lirinë e besimit, tolerancën fetare dhe ekstremizmin fetar në Shqipëri, me qëllim kuptimin e arsyeve kryesore të shfaqjeve të veprimeve ekstremiste që lidhen në thelb me fenë, duke analizuar raportin mes lirisë e besimit, edukimit fetar, tolerancës fetare dhe qendrimeve ekstremiste.

Eksperti i angazhuar do të jetë përgjegjës për hartimin e një metodologjie që do të ndiqet për studimin, hartimin e pyetësorit i cili do të shërbejë për gjenerimin e të dhënave online, kryerjen e intervistave me përfaqësues të institucioneve etj., si dhe hartimin e raportit final me gjetjet dhe rekomandimet përkatëse.

Angazhimi i ekspertit do të jetë për gjatë gjithë kohëzgjatjes së projektit, në periudha të ndryshme, në varësi të përmbushjes së detyrave të mësipërme dhe do të përmbyllet me prezantimin e gjetjeve në takimin që do të mbahet në periudhën nëntor-dhjetor 2019.

KShH inkurajon aplikimet nga kandidatë, të cilët janë të interesuar për t’u angazhuar si ekspertë në këtë proces dhe plotësojnë këto kritere të aftësisë individuale, edukimit dhe aftësisë profesionale si vijon:

Aftësitë individuale

Të jetë i/e pavarur, i/e paanshëm dhe me integritet;

Të ketë aftësi shumë të mira komunikimi dhe bashkëpunimi në ekip dhe jo vetëm;

Të ketë aftësi analitike dhe mendim kritik;

Të jetë i/e përgjegjshëm për respektimin e detyrave dhe afatet e vendosura;

Të ketë aftësi të punojnë nën presionin e kohës;

Edukimi dhe aftësitë profesionale

Të ketë përfunduar studimet doktorale në shkencat sociale apo juridike, të ketë njohuri të mira të çështjeve që lidhen me të drejtat e njeriut, kulturën fetare dhe çështjet e ekstremizmit në vendin tonë. Preferohen aplikantë që kanë përvojë në procese hulumtimi shkencor dhe kanë kryer studime lidhur me temat e lartpermendura. Të ketë njohuri të të gjuhës angleze (Niveli C2).

Të interesuarit të aplikojnë deri në datën 15 Janar 2019, ora 17.00, duke dërguar një propozim për metodologjinë dhe një ofertë financiare, së bashku me letrën e motivimit, CV dhe nje liste me studime te ngjashme. Dokumentet do të dërgohen në formë elektronike në adresën e e-mailit të KShH-së office@ahc.org.al.