KShH po zbaton nisëm rajonale “Përfshirja e të huajve në Ballkanin Perëndimor – qasja në të drejtat sociale dhe ekonomike (FOSTER)” mbështetur financiarisht nga Bashkimi Europian. Në themel të kësaj nisme qëndron integrimi i migrantëve, si një ndër parimet bazë që udhëheq një shtet demokratik që aspiron një respektim universal të të drejtave të njeriut. Projekti FOSTER, një partneritet mes shtatë OSHC-ve të lidhura me Këshillin Ballkanik për Refugjatët dhe Migracionin (BRMC) dhe Këshillin Danez për Refugjatët (DRC), synon të forcojë kapacitetet e OSHC-ve për t’i adresuar sfidat me të cilat përballen shtetasit e huaj në Ballkanin Perëndimor në mënyrë efektive dhe të qëndrueshme.
Në kuadër të kësaj nisme është parashikuar formimi i një platforme informale në formën e një rrjeti të organizatave të shoqërisë civile, i cili do të zhvillojë një sërë vizitash intervistuese në terren me institucionet dhe aktorët përgjegjës për ofrimin e shërbimeve me karakter ekonomik dhe social ndaj të huajve me qëndrim në Shqipëri. Secili nga anëtarët e kësaj platforme do të ketë mundësinë të angazhohet në vizita monitorurese, të fokusuara në verifikimin e dhënies së shërbimeve që kategorizohen në një nga fushat prioritare të veprimtarisë së tij, ose më gjerë.
Ky proces monitorues synon të vlerësojë lehtësinë në marrjen e informacionit mbi ofrimin e këtyre shërbimeve, sëbashku me aksesueshmërinë e tyre nga ky grup vulnerabël për të arritur një panoramë të qartë mbi nevojat konkrete për përmirësimin e këtij procesi integrues.
Që një OSHC të mund të aplikoi për pjesëmarrjen në këtë platformë si fillim do duhet që të përzgjedhë ekspertin që do të jetë përgjegjës për kryerjen e vizitave intervistuese në terren, i cili do veprojë për llogari të organizatës dhe nuk mund të ndryshohet në vijim të angazhimit.
Për të aplikuar secila organizatë duhet që të dërgojë dokumentat si më poshtë vijon:
- CV të organizatës (jo më shumë se 1 faqe);
- Një letër motivimi për pjesëmarrjen në këtë proces (jo më shumë se 1 faqe);
- Cv të ekspertit përgjegjës për kryerjen e vizitave intervistuese (jo më shumë se 1 faqe).
Ju inkurajojmë që dokumentat e nevojshme për aplikim të jenë sa më koncize dhe të referojnë eksperiencat e përshtatshmërinë e organizatës dhe ekspertit të propozuar me objektin e aktivitetit.
Dokumentacioni i mësipërm duhet të dërgohet brenda datës 10.10.2025 në adresën elektronike office@ahc.org.al
