Komiteti Shqiptar i Helsinkit (KShH), në kuadër të projektit “Përmirësimi i situatës të të drejtave të njeriut në Shqipëri nëpërmjet forcimit të shtetit të së drejtës – Klinika ligjore XII” i cili mbështetet financiarisht nga Civil Rights Defenders shpall thirrjen publike për vëzhgues për monitorimin e aksesit në drejtësi të grupeve vulnerabël, sipas një metodologjie të detajuar. Objekt monitorimi është ndihma juridike dytësore, që konsiston në shërbimin juridik, që ofrohet për përpilimin e akteve të nevojshme për të vënë në lëvizje gjykatën; ofrimi i këshillimit, përfaqësimit dhe mbrojtjes para gjykatës në çështjet administrative, civile dhe në çështjet penale, për të cilat nuk zbatohet mbrojtja e detyrueshme, sipas përcaktimeve të legjislacionit procedural penal. [neni 3/c]. Ky monitorim do të shtrihet përgjatë muajit nëntor dhe do të kryhet pranë Gjykatës së Rrethit Gjyqësor, Tiranë.
KShH inkurajon aplikimet nga kandidatë, të cilët janë të interesuar për t’u angazhuar si ekspertë në këtë proces dhe plotësojnë këto kritere të aftësisë individuale, edukimit dhe aftësisë profesionale në vijim:
Aftësitë individuale
- Të jetë i/e pavarur, i/e paanshëm dhe me integritet;
- Të ketë aftësi shumë të mira komunikimi dhe bashkëpunimi në ekip dhe vetëm;
- Të ketë aftësi analitike dhe mendim kritik;
- Të jetë i/e përgjegjshëm për respektimin e detyrave dhe afatet e vendosura;
- Të ketë aftësi të punojnë nën presionin e kohës.
Edukimi dhe aftësitë profesionale
- Të ketë përfunduar ose të jenë duke ndjekur studimet Bachelor/Master ose të njehsuara me to në Fakultetin e Drejtësisë.
- Preferohen aplikant që kanë përvojë në procese të monitorimit.
- Të ketë njohuri të mira mbi gjyqësorin dhe aksesin në drejtësi si dhe të jenë njohës të mirë të gjuhës angleze
Të interesuarit të aplikojnë deri në datën 24 Tetor 2018, duke dërguar një CV dhe një Letër Motivimi. Dokumentet do të dërgohen në formë elektronike në adresën e e-mailit të KShH-së office@ahc.org.al.
