Komiteti Shqiptar i Helsinkit (KShH), më datë 20 shtator 2017 monitoroi mbledhjen e posaçme të drejtuesve të Institucioneve të Arsimit të Lartë (IAL) për përzgjedhjen e kandidatëve për anëtarë të Këshillit të Lartë Gjyqësor (KLGJ) dhe Këshillit të Lartë të Prokurorisë (KLP).
Gjatë këtij monitorimi u konstatua se përfaqësuesit e IAL-ve dhe të Shkollës së Magjistraturës respektuan nenin 48 e vijues, si dhe nenin 146 e vijues të Ligjit nr. 115/2016 “Për organet e qeverisjes së sistemit të drejtësisë”, ku bëhet fjalë për procedurën e thirrjes së mbledhjes, kuorimit të nevojshëm, procesit të votimit dhe numërimit të votave, si dhe shpalljes së rezultatit të kandidatëve për KLGJ dhe KLP, nga rradhët e pedagogëve.
Medias, organizmave ndërkombëtare dhe organizatave të shoqërisë civile vendase (në rastin konkret KShH-së), iu krijuan të gjitha mundësitë dhe kushtet e vëzhgimit dhe monitorimit të krejt procedurës ligjore që u zbatua.
Vlen të përmendet gjithashtu se përfaqësuesit e IAL-ve, të pranishëm në këtë mbledhje, u treguan proaktivë gjatë procesit dëgjimor të çdo kandidati, ku spikatën pyetjet për të evidentuar integritetin moral të kandidatëve.
Por, pavarësisht nga ato që përmendëm më lart, tërhoqi vëmendjen fakti se, numri i kandidatëve të propozuar nga IAL-të dhe që paraqitën platformat e tyre përpara Mbledhjes së Posaçme, ishte shumë i paktë në raport me numrin që parashikojnë nenet 36 dhe 134, të këtij ligji.
KShH mendon se për të mundësuar një nivel më të lartë konkurrueshmërie në radhët e kandidatëve për anëtar të KLGJ dhe KLP që përfaqësojnë trupën pedagogjike në Fakultetet e Drejtësisë dhe Shkollën e Magjistraturës, është e nevojshme të rishikohen në të ardhmen dispozitat përkatëse të ligjit nr.115/2016 që parashikojnë kuotat dhe formulën e përzgjedhjes së këtyre kandidatëve.
