Komiteti Shqiptar i Helsinkit (KShH) është duke monitoruar aspekte të rëndësishme që kanë të bëjnë me mbarëvajtjen e procesit parazgjedhor, në kuadër të zgjedhjeve parlamentare që do të zhvillohen në vendin tonë në datën 18 Qershor të këtij viti.
Me anë të medias jemi informuar se, ka parti politike që nuk kanë propozuar pranë Komisionit Qendror të Zgjedhjeve (KQZ), kandidatët për anëtarë të Komisioneve Zonale të Administrimit Zgjedhor (KZAZ). Megjithëkë, deri më sot, KQZ si organi më i lartë i administrimit zgjedhor nuk ka bërë asnjë njoftim zyrtar lidhur me këtë çështje. Nga monitorimi i kryer në zgjedhjet e kaluara në vendin tonë, kemi vërejtur se KQZ ka treguar më shumë aktivizëm sa i takon reagimeve publike ndërgjegjësuese për mosrespektimin e afateve ligjore nga partitë politike.
Sipas nenit 28, pika 2, të këtij Kodi, deri në datë 6 Mars 2017, partitë politike duhet të propozonin kandidatët për anëtarë të Komisioneve të Zonave të Administrimit Zgjedhor (KZAZ-ve). Në mbështetje të këtyre propozimeve, sipas pikës 1, të nenit të mësipërm, KQZ-ja deri në dt. 20 Mars 2017 duhet të miratojë vendimin për ngritjen e KZAZ-ve.
Sa më sipër, KShH i sugjeron KQZ-së që në kuadër të transparencës të ketë një rol aktiv ndërgjegjësues ndaj opinionit të gjerë publik lidhur me çështjen e mosrespektimit të afateve ligjore, pasojat si dhe për masat e nevojshme që vlerësohen se duhen marrë në këto kushte për mbarëvajtjen e procesit parazgjedhor.
