Gjetjet shqetësuese dhe rekomandimet në studimin e pandëshkueshmërisë për veprimtarinë e furrave gëlqerore realizuar nga Komiteti Shqiptar i Helsinkit, janë pasuar me një reagim të menjëhershëm të Ministrisë së Turizmit dhe Mjedisit. Vetëm një javë pasi Komiteti i përcolli konkluzionet e studimit në këtë ministri dhe në një sërë institucionesh të linjës dhe organin e akuzës, nisi aksioni për mbylljen e furrave gëlqerore në Krujë. Duke u nisur nga investigimet e vazhdueshme në media u analizua veprimtaria hetimore dhe gjyqësore e Prokurorisë dhe Gjykatës së Rrethit Gjyqësor Krujë, për veprën penale “Ndotja e ajrit”, shkaktuar nga furrat e gëlqeres.
Por çfarë vuri re Komiteti i Helsinkit në këtë studim? Gjetjet ishin disa, ndaj ne po rendisim më kryesoret:
- Studimi vë theksin në mënyrë të veçantë tek pandëshkueshmëria e krimit mjedisor në rastin e furrave gëlqerore por edhe në ato raste kur është ndëshkuar, nuk ka bërë të mundur parandalimin e përgjithshëm të veprës penale të lidhur me këto aktivitete.
- Në asnjë prej vendimeve të prokurorisë apo të gjykatës që i janë vënë në dispozicion KShH-së nuk rezulton që Inspektoriati Shtetëror i Mjedisit, Pyjeve dhe Ujërave, Durrës (Inspektorati) apo Bashkia e Krujës të kenë denoncuar ndërhyrjet negative të kryera nga shtetasit apo subjektet e ndryshme të cilat kanë dëmtuar mjedisin.
KShH do vijojë të monitorojë ndjekjen e kësaj çështje, duke ushtruar mjetet ligjore në mbrojtje të jetës dhe shëndetit të banorëve. Për më shumë ju ftojmë të njiheni me studimin e plotë të KShH-së, të publikuar në linkun:
Nisma për ndjekjen e kësaj çështje u realizua me mbështetjen financiare të Programit të Granteve të Vogla të Komisionit për Demokraci i Ambasadës së SH.B.A.-së në Tiranë.
