Kështu, për të zgjeruar mbulimin gjeografik të vendit me vëzhgues dhe korrespondentë, KShH-ja synon të rritë rrjetin e aktivistëve dhe kapacitetet e tyre në mënyrë që të rritë nivelin e profesionalizmit, objektivitetin në vëzhgim, vetaktivizimin e vëzhguesve, si dhe cilësinë e raportimit të tyre. Gjithashtu, ndien nevojën të rishikojë dhe të përmirësojë edhe procesin e vet të monitorimit të punës së aktivistëve të saj, të përfshijë rrjetin e aktivistëve në fushatat e KShH-së për lobim dhe mbrojtje ligjore në nivel vendor, si dhe të rritë bashkëpunimin me mediat lokale për të përcjellë mesazhin në mënyrë të thjeshtë dhe të kuptueshme për publikun e gjerë.

Korespondentët janë pjesë e strukturës së KShH, që veprojnë jo me kohë të plotë, megjithatë roli i tyre është shumë i rëndësishëm. Kapacitetet e tyre, të fuqizuara vit pas viti, i japin mundësi organizatës të verifikojë, të monitorojë dhe të ndërhyjë, në kohë rekord, për ngjarje e situata të shkeljes së të drejtave të njeriut kudo në Shqipëri. Korresponndentët janë, gjithashtu edhe një pikë mbështetëse në rastet e zhvillimit të veprimtarive në zonën ku ata veprojnë. Ata kanë bashkëpunuar edhe për projekte monitorimi e vëzhgimi  të situatave, që kanë qenë objekt i projekteve që ka zbatuar organizata gjatë këtyre viteve.

Rrjeti i korrespondentëve dhe i vëzhguesve është instruktuar e kualifikuar në vazhdimësi, si për çështje konkrete, për të cilat janë thirrur të veprojnë, ashtu dhe për çështje bazike të të drejtave të njeriut. Një rëndësi e veçantë iu është kushtuar dhe shtimit të numrit të vëzhguesve dhe bashkëpunëtorëve, të specializuar, duke i përzgjedhur ata nga fusha e shëndetësisë, drejtësisë dhe psikologjisë.