Ky artikull synon të analizojë në vështrim kushtetues, disa prej nismat që kanë zgjeruar apo synojnë të zgjerojnë, kompetencën lëndore të Prokurorisë (pjesë e SPAK-ut) dhe Gjykatës së Posaçme kundër Korrupsionit dhe Krimit të Organizuar (GJKKO). Në këtë analizë, jam ndalur në mënyrë të veçantë në pajtueshmërinë e këtyre nismave me amendamentet kushtetuese të reformës në drejtësi (miratuar me ligjin nr.76/2016), të cilat vendosin kufijtë kushtetues të kompetencës lëndore të këtyre institucioneve, por njëkohësisht edhe me parime të tjera kushtetuese që qëndrojnë në themel të organizimit dhe funksionimit të institucioneve, si parimin e shtetit të së drejtës dhe atë të ndarjes dhe balancimit të pushteteve, hierarkia e akteve normative në Republikën e Shqipërisë, standartet e detyrueshme për t’u plotësuar në rastet e kufizimit të të drejtave dhe lirive themelore, sipas testeve të parashikuara në nenin 17 të Kushtetutës, etj.
Përveç analizës kushtetuese, artikulli shtjellon edhe disa elementë të lidhur me problematikat qe kanë ndeshur SPAK-u dhe Gjykatat e Posaçme, të ngritura me vonesë, në drejtim të plotësimit me burimet e nevojshme njerëzore si dhe ngarkesa me të cilën janë përballur në kuadër të zbatimit të kompetencave shtesë para dhe pas reformës në drejtësi, të cilat, kanë dobësuar objektivin madhor që ato duhet të kishin në luftën kundër korrupsionit dhe krimit të organizuar, me fokus të posaçëm, zyrtarët dhe ish zyrtarët e nivelit të lartë.
