Autoritetet të hetojnë me precedencë për përgjegjësinë lidhur me ngjarjen tronditëse për vdekjen e shtetases së moshuar të Minoritetit Rom, për të cilën familjarët ishin në kërkim prej disa muajsh

Komiteti Shqiptar i Helsinkit (KShH) në gazetën “Tema” të datës 25 Janar 2023, u njoh me një lajm tronditës dhe të dhimbshëm. Një grua e moshuar  (71 vjeç) me banim në fshatin Rom të Fierit, para 6 muajsh ishte larguar nga shtëpia , nuk ishte kthyer dhe nuk dihej ku ndodhej. Për zhdukjen e saj familjarët kishin njoftuar komisariatin e policisë Fier, por nuk kishin asnjë përgjigje. Kërkimet e tyre ishin pa rezultat.

Në emisionin televiziv të mbrëmjes “Pa gjurmë”, të datës 24 Janar 2023 familjarët e të zhdukurës, mësuan për herë të parë dhe në mënyrë të papritur se nëna e tyre D.A e shtruar në spitalin neurologjik në QSUT prej 6 muajve, kishte ndërruar jetë para disa orësh dhe trupi i saj ishte vendosur në morg.

KShH vlerëson se të dhënat e mësipërme bëjnë të domosdoshëm një verifikim të shpejtë, të gjithanshëm, objektiv dhe transparent.

KShH i sugjeron:

1. Drejtorisë së Përgjithshme të Policisë së Shtetit të verifikojë dhe informojë familjarët e nënës së ndjerë dhe publikun nëse janë venë në lëvizje pas njoftimit të familjarëve, cilat janë verifikimet që janë bërë për gjetjen e të moshuarës, a janë kontaktuar strukturat e shëndetësisë, dhe nëse është zbatuar ligji dhe udhëzimet përkatëse.
2. Drejtorisë së QSUT, të verifikojë dhe të informojë familjarët e nënës së ndjerë dhe publikun për rrethanat, shkakun e shtrimit dhe procedurat e ndjekura në spital për shtrimin dhe mbajtjen e zonjës, nëse janë bërë verifikime për identitetin e saj, nëse janë njoftuar familjarët, cila ka qënë diagnoza dhe shkaku i vdekjes, nëse për këtë janë njoftuar organet e policisë apo të prokurorisë.
3. Prokurorisë së Fierit dhe të Tiranës,  që me nismën e tyre në bazë të të dhënave në media apo informacioneve të tjera, të hetojnë çështjen  penale nëse ka të dhëna dhe prova që përmbajnë elemente të veprës penale.

Në përfundim, KShH e sheh të nevojshme të theksojë se në raste të tilla organet dhe institucionet përkatëse duhet të veprojnë jo vetëm me shpejtësi dhe përgjegjshmëri, por edhe në bashkëpunim midis tyre. Shëndeti dhe jeta e çdo njeriu ka përparësi.