Komiteti Shqiptar i Helsinkit (KShH) në ushtrim të misionit të tij është njohur me ankesën e një gazetareje për të cilën ka detyrimin e respektimit të anonimatit të saj. Marrë shkas nga kjo ankesë dhe të dhënat që KShH disponon nga veprimtaria e tij sikurse është rasti i ndërprerjes së marrëdhënieve të punës së disa punonjësve të Radio Televizionit Shqiptar një vit më parë, vërejmë me shqetësim se ka ende punonjës të mediave që përballen prej kohësh me vendime apo presion për zgjidhje të padrejta të kontratave të punës, vonesa në kalimin e pagës mujore, mosderdhjen rregullisht të sigurimeve shoqërore dhe shëndetësore, mungesën në disa raste të kontratave të rregullta të punës, ekzekutimin e pagës pjesërisht në rrugë informale.
Shkeljet e mësipërme, ndër të tjerash bien ndesh me nenet 12, 95, 116 e 118 të ligjit nr. 7961, datë 12.7.1995 “Kodi i Punës i Republikës së Shqipërisë”, si dhe me ligjin nr. 9136, datë 11.9.2003 “Për mbledhjen e kontributeve të detyrueshme të sigurimeve shoqërore dhe shëndetësore në Republikën e Shqipërisë”. Kjo situatë, e shoqëruar edhe me elementë të censurës apo vetë censurës në ambientin e punës krijon tek gazetarët shqetësime psikologjike dhe shëndetësore dhe një mjedis pune të pasigurtë, çka vështirëson misionin e tyre në shërbim të publikut dhe të vërtetës.
Ka pasur çështje që KShH i ka përfaqësuar në rrugë administrative dhe gjyqësore, ndërkohë që punonjësit e medias shpesh herë ndihen të frikësuar për të iniciuar procese të tilla. Është pozitiv fakti që tashmë në sistemin tonë gjyqësor janë krijuar disa precedentë pozitiv të praktikës gjyqësore, në mbrojtje të lirisë së medias dhe të drejtave të punonjësve të medias. Kjo praktikë mund të shërbejë për të frymëzuar kolegët e medias që gjenden në kushte të njëjta apo të ngjashme të cenimit të të drejtave të tyre.
KShH vlerëson në mënyrë të veçantë mbrojtjen e lirisë kushtetutese të shprehjes dhe të medias së lirë në një shoqëri demokratike, sanksionuar në nenin 22 të Kushtetutës. Gjykata Europiane e të Drejtave të Njeriut është shprehur se “liria e shprehjes përbën një nga themelet kryesore të shoqërisë demokratike dhe një nga kushtet bazë për përparimin e saj dhe për zhvillimin e çdo njeriu” (çështja Handyside kundër Mbretëria e Bashkuar).
Si rrjedhojë e mungesës së një sindikate për punonjësit e medias dhe vështirësitë objektive që ata kanë në krijimin e saj, KShH i sugjeron Unionit të Gazetarëve dhe organizatave të tjera të medias në vendin tonë të reagojnë në mënyrë sistematike dhe ndërhyjnë institucionalisht për të parandaluar në të ardhmen shkeljet e të drejtave të gazetarëve dhe punonjësve të tjerë të medias në vendin tonë.
