Komiteti Shqiptar i Helsinkit (KShH) e mirëpriti Ligjin Nr: 141/2016 që, veç të tjerave, amnistoi nga ndjekja penale të gjithë personat që vullnetarisht deri në datën 30 Prill 2017 deklarojnë ose njoftojnë organet e policisë për dorëzimin e armëvë të zjarrit të çdo lloji.
KShH mbështet organet e policisë së shtetit që në zbatim të nenit 7 të ligjit të mësipërm, ndërmorrën nismën për sensibilizimin e shtetasve që mbajnë armë zjarri pa leje që ti dorëzojnë ato.
KShH vëren me kënaqësi se me këtë nismë u bashkuan edhe mjaft shtetas të tjerë sidomos të rinjtë si dhe komunitete fetare që në këtë drejtim mund të luajnë një rol të rëndësishëm.
Jemi të gjithë të ndërgjegjshëm se me armët e zjarrit të çfarëdo lloji qofshin ato, për shkaqe dhe motive të ndryshme madje edhe banale, u është marrë jeta një numri të konsiderueshëm njerëzish.
Është tronditës dhe i dhimbshëm fakti se armët e zjarrit kanë shkaktuar viktima edhe në gjirin e familjes, duke përfshirë edhe fëmijët.
Dorëzimi vullnetar i armëvë të zjarrit është një mundësi që ata që i mbajnë pa leje, të mos procedohen penalisht.
Opinioni i gjerë shoqëror është direkt i interesuar që të kontribuojë në dorëzimin vullnetar të armëve të zjarrit. Praktika ka vërtetuar se mbajtja dhe përdorimi i armëve të zjarrit ka shkaktuar qoftë edhe nga pakujdesia viktima të pafajshme. Dorëzimi vullnetar i armëve do të thotë ruajtje e gjësë më të shtrenjtë: jetës. Si rrjedhim do të ketë më pak të proceduar penalisht dhe të dënuar, më pak krime.
KShH që ka për mision mbrojtjen dhe respektimin e lirive dhe të drejtave të njeriut, u bën thirrje shtetasve që mbajnë pa leje armë zjarri, të mos hezitojnë që deri më 30 Prill 2017 ti dorëzojnë ato.
Konfliktet e mundshme që mund të lindin duhen zgjidhur me mjete të ligjshme. Të afërmit, miqtë dhe shokët opinion i shëndoshë shoqëruar mund dhe duhet të ndihmojnë në zgjedhjen e tyre.
KShH u sugjeron gjithashtu organeve përkatëse shtetërore që të jenë më pranë njerëzve, të intensifikojnë dhe të koordinojnë më mirë masat parandaluese, të vlerësojnë dhe të zgjidhin më shpejt dhe në përputhje me ligjin ankesat dhe konfliktet e mundshme.
