Është detyrim i shtetit të ndërhyjë kur të drejtat e njeriut cënohen edhe kur ata punojnë në sektorin apo sipërmarrjen private

Media elektronike dhe ajo e shkruar njoftojnë se ka katër ditë që punonjësit e Nën-stacionit elektrik në Poçëm janë futur në grevë urie. Ato pretendojnë se kanë 27 muaj që nuk kanë marrë pagat megjithëse për këtë kanë vënë në dijeni organet e pushtetit shtetëror, askush nuk ka ndërhyrë për të zgjidhur kërkesat e tyre të ligjshme për një çështje kaq jetësore që prek një numër të konsiderueshëm familjesh. E vetmja e ardhur e tyre është paga, si rrjedhim pasojat janë të rënda.
Komiteti Shqiptar i Helsinkit (KShH), edhe pse nuk është në dijeni të detajeve që kanë çuar në një gjëndje kaq shqetësuese, e shikon të nevojshme ti sugjerojë organeve përkatëse shtetërore që të ndërhyjnë për zgjidhjen e saj. Indiferentizmi në në një shkelje kaq brutale të të drejtave të punonjësve që vazhdojnë grevën e urisë për KShH është e papranueshme. Shteti ka detyrime pozitive të ndërhyjë në raste të tilla, ta zgjidhë çështjen dhe të vendosë përpara përgjegjësisë ligjore ata që e kanë shkaktuar atë. Detyrimi pozitiv i shtetit në raste të tilla është sanksionuar në disa vendime të Gjykatës Evropiane të të Drejtave të Njeriut.