Komiteti Shqiptar i Helsinkit (KShH) prej më shumë se një viti po ndjek në rrugë ligjore çështjen e mungesës së ujit të pijshëm për banorët e fshatit Visokë, Bashkia Mallakastër. Mungesa e ujit të pijshëm është e lidhur pandashmërisht me të drejtën themelore të jetës dhe të drejtën themelore për një jetë të qetë familjare dhe private. Ndaj për shkeljen e këtyre të drejtave, KShH ka filluar në emër të banorëve një proces gjyqësor, i cili po ndiqet dhe përfaqësohet nga avokatët e Klinikës Ligjore të organizatës tonë.
Procesi gjyqësor për kërkimin e të drejtave të shkelura të banorëve të Visokës zgjati rreth 8 muaj në Gjykatën Administrative të Shkallës së Parë Vlorë, e cila, së fundmi konstatoi me vendim përfundimtar se mungesa e gjatë e ujit të pijshëm për këta shtetas ka shkaktuar dëm tek ata. Gjykata urdhëroi kompensimin e dëmit që i është shkaktuar banorëve, bashkërisht nga organet shtetërore përgjegjëse. Ky është vendimi i parë gjyqësor në Shqipëri i këtij lloji dhe përbën pjesërisht model pozitiv të mbrojtjes së drejtpërdrejtë gjyqësore të individëve në nevojë.
Megjithatë, mospranimi nga kjo Gjykatë i kërkimit të banorëve për detyrimin e institucioneve shtetërore për furnizimin me ujë të pijshëm, nuk ndihmon në ndryshimin e gjendjes dhe nuk inkurajon plotësisht qytetarët për kërkimin e të drejtave të natyrës social-ekonomike në gjykatë. Në thelb vendimi edhe pse pranon se ka patur një dëm nuk i detyron institucionet që tu sigurojnë banorëve të fshatit furnizimin me ujë të pijshëm. Institucionet e paditura në këtë çështje janë organet shtetërore përkatëse, vendore dhe qëndrore, si Bashkia Mallakastër, Ministria Infrastrukturës dhe Energjisë si dhe Agjensia Kombëtare e Ujësjellës-Kanalizime, etj. KShH është në pritje të vendimit të arsyetuar të Gjykatës Administrative të Shkallës së Parë, për të cilin do të ushtrojmë të drejtën e ankimit në Gjykatën Administrative të Apelit Tiranë.
Kjo çështje është ndjekur në kuadër të Projektit “Të kontribuojmë në respektimin dhe rivendosjen e të drejtave të shkelura të banorëve të Visokës”, mbështetur financiarisht nga Fondacioni Shoqëria e Hapur për Shqipërinë (OSFA).
