Në këtë drejtim i sugjerojmë institucioneve shtetërore të jenë më të ndjeshme, të veprojnë me transparencë, duke realizuar me minatorët një dialog të hapur, konstruktiv dhe gjithëpërfshirës. Në zgjidhjet e ofruara, vlerësojmë se duhet të merren në konsideratë dhe të adresohen të gjitha kushtet e vështira në të cilën minatorët kanë punuar dhe vazhdojnë të punojnë, duke rrezikuar edhe jetën e tyre.
KShH i bën thirrje organeve përkatëse shtetërore që ti japin përparësi shqyrtimit të kërkesave të minatorëve, me synim zgjidhjen e tyre edhe nëse do të nevojiteshin ndryshime në legjislacionin në fuqi.
Gjithashtu, KShH dëshiron të tërheqë vëmendjen se në një vend demokratik problemet zgjidhen me dialog dhe në përputhje me ligjin dhe shtetin e së drejtës. Thirrjet për përdorimin e dhunës nga grupet e interesit jo vetëm që janë në kundërshtim me ligjin por nuk i shërbejnë dialogut konstruktiv që duhet të ndërtohet me institucionet për zgjidhjen e drejtë të çështjes.
KShH vëren se minatorët vazhdojnë të punojnë në kushte të vështira, ku masat e mbrojtjes së tyre në punë nuk janë efektive, me pasoja të rënda për shëndetin dhe jetën e tyre. Gjithashtu, bazuar në gjendjen e tyre të vështirë ekonomike dhe kushtet në të cilat punojnë, KShH bashkohet me kërkesat e tyre për një status që mundëson mbrojtje sociale më të mirë nga shteti si dhe trajtim financiar dinjitoz gjatë marrëdhënieve të punës. KShH konstaton se në të kaluarën ka pasur raste që janë dhënë premtime ndaj minatorëve, të cilat nuk janë zbatuar.
Komiteti Shqiptar i Helsinkit (KShH) ka ndjekur në vazhdimësi kërkesat, protestat si dhe grevat e urisë së minatorëve. Në të kaluarën, KShH ka reaguar në rastet kur minatorët kanë humbur jetën në mënyrë tragjike për shkak të kushteve të vështira në të cilat ata punojnë.
