Konventa e OKB-së kundër Torturës dhe Vuajtjeve të Tjera ose Trajtimit Mizor, Jonjerëzor a Degradues është pjesë e legjislacionit të brendshëm të Republikës së Shqipërisë dhe përbën bazën për marrjen e masave për eliminimin e çdo forme të torturës dhe trajtimit apo dënimit çnjerëzor dhe degradues nga autoritetet shtetërore Shqiptare.

KShH ka monitoruar në vazhdimësi respektimin e këtij kuadri ligjor nga institucionet ligjzbatuese dhe nga organet e sistemit të drejtësisë, duke patur në fokus të veçantë të drejtat e personave të privuar nga liria që trajtohen në stacionet e policisë, në burgje, spitale psikiatrike, etj. Po ashtu ka ndjekur edhe gjyqësisht në gjykatat e brendshme dhe ndërkombëtare disa çështje gjyqësore në të cilat ka rezultuar që shtetasit e ndryshëm i janë nënshtruar trajtimit çnjerëzor dhe degradues nga ana e autoriteteve shtetërore përgjegjëse.

Bazuar në konkluzionet dhe gjetjet nga veprimtaria monitoruese e advokuese, KShH i ka përcjellë Komitetit Kundër Torturës, pranë OKB-së disa Komente me Shkrim lidhur me zbatimin e kësaj Konvente nga autoritetet shtetërore shqiptare.