Sipas njoftimeve në media, Komisioni Europian, nëpërmjet Raportit për Shqipërinë të përgatitur prej tij ka vendosur të rekomadojë hapjen e negociatave pa kushte për Shqipërinë.

Komiteti Shqiptar i Helsinkit (KShH) e përshëndet këtë vendim, duke shpresuar se ai do të shënojë edhe një hap përpara në respektimin e lirive dhe të drejtave të njeriut.

Ky është një lajm i gëzuar dhe inkurajues për gjithë shqiptarët. KSHH e shikon të nevojshme të evidentojë faktin se çelja e bisedimeve përfaqëson dhe ëndrrën e gjithë shqiptarëve e shprehur tek kërkesa tyre e kahershme “E duam Shqipërinë si gjithë Europa”.

Në Raport vlerësohen në mënyrë të veçantë masat e marra dhe hapat e hedhura për realizimin e reformës me sistemin e drejtësisë dhe zbatimi i kësaj reforme në praktikë. KSHH shpreson se reforma në drejtësi, pavarësisht nga disa vonesa dhe vështirësitë që e kanë shoqëruar në procesin e deritanishëm të zbatimit të saj, do ti japë një goditje të fortë koncepteve dhe pasojave të pandëshkueshmërisë, sidomos tek të zgjedhurit dhe funksionarët e lartë, do të largojë duart e politikës nga institucionet e pavarura të drejtësisë dhe do të rrisë besimin e shtetasve ndaj tyre.

KSHH mendon gjithashtu se, për qeverinë dhe gjithë forcat politike ky vendim i rëndësishëm dhe historik duhet të jetë një test reflektimi për të bërë bilancin e asaj që është bërë dhe asaj që duhet bërë. KSHH sugjeron që në qendër të kësaj analize duhet të qëndrojnë kritere konstruktive, respektimi i parimit të kontrollit dhe balancimit të pushteteve, rritja e përgjegjësive, transparenca dhe llogaridhëniae organeve publike karshi qytetarëve, shmangia e pabarazisë së tejskajshme dhe lufta ndaj diskriminimit, shmangia e gjuhës së urrejtjes dhe atmosferës së tensionuar politike. Në mënyrë të veçantë, kjo analizë reflektimi dhe angazhimi i institucioneve të vendin tonë në të ardhmen duhet të ketë si busull orientimi respektimin e interesit publik dhe liritë dhe të drejtat e njeriut.