Litigim strategjik kundër diskriniminimit të anëtarëve të Komunitetit Rom që sigurojnë jetesën nga mbledhja e materialeve të riciklueshme
Komiteti Shqiptar i Helsinkit, në bashkëpunim me avokatët e European Roma Rights Center, në dt. 16 Janar 2018, iu drejtua Gjykatës Administrative të Shkallës së Parë Tiranë me Kërkesë-padi për konstatimin e diskriminimit në formën e “Shqetësimit” dhe “Diskriminimit të tërthortë ” ndaj 5 Paditësve që i përkasin Komunitetit Rom në Bashkinë Tiranë, të cilët sigurojnë jetesën duke mbledhur dhe shitur materiale të riciklueshme.
Me anë të kësaj padie, e konsideruar si litigim strategjik, synojmë rivendosjen në vend të të drejtave të shkelura të anëtarëve të këtij Komuniteti si pasojë e sjelljes diskriminuese të organeve shtetërore dhe qëndrore të cilat kanë shkelur dinjitetin e Paditësve. Ndër të tjera, në këtë Kërkesë-padi evidentohet fakti i mos-ofrimit të zgjidhjeve alternative në kushtet e bllokimit të veprimtarisë së tyre si dhe të mungesës së minimumit jetik, i cili nuk është i përcaktuar ende me akte ligjore dhe nënligjore. Gjithashtu është kërkuar edhe kompensim për dëmin jopasuror nga sjellja diskriminuese për secilin nga Paditësit.
