Në 16 Dhjetor të vitit 1990, një grup intelektualësh të njohur vendas themeluan Komitetin Shqiptar të Helsinkit, organizatën e parë joqeveritare në Shqipëri. Në atë kohë organizata emërtohej “Forumi i të drejtave të njeriut”, emërtim i cili ndryshoi me anëtarësimin e saj në Federatën Ndërkombëtare të Helsinkit. Deklarata e parë e Komitetit Shqiptar të Helsinkit ishte thirrja drejtuar Kuvendit të Shqipërisë që të vendoste lirimin e të gjithë të dënuarve dhe të internuarve për motive politike. Ky ishte një qëndrim dhe thirrje e rëndësishme në një kohë ku regjimi komunist po rrëzohej.
Sot, 26 vite nga themelimi i KShH-së, dëshirojmë të shprehim mirënjohje të thellë dhe falenderim të veçantë për kontributin aktiv dhe të çmuar të themeluesve të organizatës, disa prej të cilëve intelektualë të shquar që sot nuk jetojnë më. Falenderojmë gjithashtu të gjithë anëtarët, drejtuesit ekzekutivë, stafin dhe aktivistët e KShH-së ndër vite, të cilët i kanë dedikuar organizatës përkushtim, vigjilencë dhe profesionalizëm, fryt i një pune të palodhur, në mbrojtje të të drejtave dhe lirive të shtetasve. Kontributi i KShH-së në këto 26 vite është frymëzimi ynë për të ecur me hapa të sigurt dhe profesional në rrugëtimin e veprimtarisë watchdog, reagimit publik dhe qëndrimit oponent me shtetin, sa herë që të drejtat dhe liritë e shtetasve mund te cenohen ose cenohen efektivisht.
