Para disa ditësh filloi fushata elektorale. Është e drejtë e të gjitha subjekteve zgjedhore të shpalosin programet dhe alternativat e tyre. Por propaganda, siç përmendet edhe në Kodin Zgjedhor, duhet të jetë e ligjshme. Kjo, veç të tjerave do të thotë: të shmanget retorika e gjuhës së urrejtjes dhe incidentet që tensionojnë atmosferën politike.
Komiteti Shqiptar i Helsinkit (KShH) shpreh bindjen se vullneti politik i partive politike (subjekte zgjedhore) është faktor i rëndësishëm për garantimin e zgjedhjeve të lira, të drejta dhe të standardeve që kërkohen.
Zgjedhjet periodike për çdo vend demokratik siç dihet, janë një ngjarje e rëndësishme. Në 25 Prill 2021 populli do të zgjedhë përfaqësuesit e tij në Kuvendin e Shqipërisë. Në këtë vështrim, përgatitja e opinionit të gjerë publik është e një rëndësie të veçantë. Është e drejtë e subjekteve zgjedhore të marrin takim me votuesit, të ballafaqohen me kërkesat dhe problemet që ata kanë, por edhe për t’u angazhuar para tyre çfarë do të bëjnë ata në katër vitet e ardhshme. Momentet e zhvillimit të kësaj fushate, siç dihet, nuk janë të zakonshme. Ka më se një vit që jetojmë nën kërcënimin dhe ankthim e një viroze me rrezikshmëri të theksuar për shëndetin dhe jetën e njerëzve.
Njoftimet e përditshme për qindra persona të infektuar nga Covid 19 dhe humbjen e jetës së dhjetrave të tjerë, janë të dhimbshme dhe shqetësuese. Rrugët dhe mjetet për ta mposhtur këtë virozë, janë masat parandaluese të përcaktuara nga Komiteti teknik i ekspertëve dhe të sanksionuara në dispozitat përkatëse ligjore. Kur nga çdonjëri prej nesh kërkohet të ruajmë veten dhe të tjerët duke vendosur maskën dhe duke respektuar distancën, ç’mund të thuhet për takimet apo mbledhje që organizojnë subjektet zgjedhore në kundërshtim me masat parandaluese. Raste të tilla krijojnë rrezik të shtuar me pasoja të mëvonshme në dëm të shëndetit dhe jetës së njerëzve që mund të çojnë në keqësimin e gjendjes.
Është kjo arsyeja që KShH e sheh të nevojshme t’u bëjë thirrje partive politike dhe në veçanti çdo kandidati për deputet që në një situatë të tillë të tregohen të përmbajtur dhe të mos mbivlerësojnë interesat e ngushta partiake.
Pretendimet se gjatë fushatës nuk mund të respektohen masat e përcaktuara, pra si pasojë duhen toleruar kjo është jo vetëm e dëmshme, por edhe e pajustifikueshme. Ligji është i barabartë për të gjithë. Dy standarde nuk mund të ketë sidomos kur është çështja e mbrojtjes së shëndetit dhe jetës së njerëzve.
Për të gjithë është e qartë se parandalimi i së keqes është kryesor. Por në raste të veçanta edhe sanksionet në përputhje me ligjin janë të nevojshme.
KShH shpreson dhe dëshiron gjatë këtij muaji të fushatës zgjedhore, subjektet garuese të zbatojnë Kodin Zgjedhor, udhëzimet e KQZ-së dhe të gjitha masat parandaluese që ndikojnë në uljen e numrit të të infektuarve dhe që gradualisht do të çojnë në normalizimin e gjendjes.
