Komiteti Shqiptar i Helsinkit (KShH) është duke ngritur ekipin e vëzhguesve që do të angazhohen në monitorimin e dy prej gjashtë Bashkive, ku do të zhvillohen zgjedhjet e pjesshme për Kryetar Bashkie, përkatësisht në Dibër dhe Vorë.

Edhe 24 ditë na ndajnë nga zgjedhjet e pjesshme vendore, ndërkohë që ditëm e sotme, Komisioni Qendror i Zgjedhjeve komunikoi përfundimin e afatit për dorëzimin e dokumentacionit të kandidimit, i cili është respektuar nga 4 subjekte zgjedhore, të cilat në total kanë propozuar 20 kandidatura për kryetar bashkie.  Komisioni Qendror i Zgjedhjeve është duke verifikuar dokumentacionin, si dhe pastërtinë e figurës për kandidatët. Duke qenë se afatet e verifikimit që kryen KQZ janë të ngushta, KShH i bën thirrje ndërgjegjësuese të gjithë zgjedhësve në 6 Bashkitë e Vendit si dhe publikut të gjerë, të njihen me formularët e kandidatëve të publikuar në faqen zyrtare të internetit të KQZ-së. Kushdo që ka informacion për aspekte që lidhen me mungesën e integritetit si rezultat i procedimeve penale apo vendimeve penale të dënimit ndaj tyre (brenda apo jashtë vendit), mund t’i sinjalizojë ato pranë KQZ-së.

Në zgjedhjet e kaluara parlamentare, u vërejt se indiciet që kanë nxitur KQZ-në për të kërkuar verifikim të thelluar nga Prokuroria e Përgjithshme kanë qenë të dhënat e dokumentuara nga vetë subjektet në formularët e tyre të dekriminalizimit. Mgjth, kontributi që vetë zgjedhësit mund të japin sa i takon pastërtisë së kandidaturave është ndihmues dhe parandalon zgjedhjen e kryetarëve që mund të kenë probleme me ligjin e dekriminalizimit. Vlen të theksohet që një pjesë e kryetarëve të Bashkive ku po zhvillohen këto zgjedhje përfunduan mandatin e tyre pikërisht si rezultat i pengesave të ndalimit të kandidimit, të zbuluara pasi u zgjodhën në këtë funksion. Do të ishte e patolerueshme përsëritja e të njëjtës situatë, pasi kostot për zhvillimin e zgjedhjeve janë të konsiderueshme dhe ato rëndojnë tek takspaguesit shqiptarë. Ndaj detyrimi për sinjalizimin merr një rëndësi të veçantë për të parandaluar raste të tilla.

Me ligj është ndaluar përdorimi i burimeve njerëzore për qëllime elektorale (Neni 3 i Kodit Zgjedhor). Ligji ndalon dhe ndëshkon ashpër shitblerjen e votës. Praktika e zgjedhjeve të kaluara ka evidentuar problematika në këtë drejtim. Ndaj, është detyrë e çdo shtetasi që ka dijeni t’i sinjalizojë ato në mënyrë sa më të plotë, qoftë edhe anonime (por që ka të dhëna të mjaftueshme për verifikime të mëtejshme) pranë KQZ-së.

Listat e zgjedhësve raportohen se janë përditësuar, por nuk përjashtohen mungesat dhe pasaktësitë. Është e drejta e zgjedhësve të kërkojnë ndryshimet përkatëse në këto lista dhe të njihen dhe me qendrën ku ata do të votojnë. Zgjedhësi duhet t’i kushtojë gjithashtu vëmendje vlefshmërisë së dokumentit biometrik të identifikimit, pasi pajisja me këtë dokument të vlefshëm është detyrim për të ushtruar të drejtën e votës sipas Kodit Zgjedhor.