Komiteti Shqiptar i Helsinkit (KShH) nëpërmjet medias është vënë në dijeni se ditët e fundit është ushtruar dhunë ndaj Gj.GJ, Kryetar i Fshatit Rraboshtë, Lezhë, S.L, Kandidate e LSI-së për Pukën, R.K, Kryetare e LRI-së si dhe B.Ç, Koordinator i LSI-së në Fushë-Krujë. Media njofton gjithashtu se tre prej këtyre shtetasve janë shtruar në spital për mjekimin e nevojshëm.

KShH dënon aktet e mësipërme si vepra të ndëshkueshme penalisht dhe i bën thirrje organeve të policisë dhe të prokurorisë që të hetojnë këto çështje me prioritet, shpejtësi dhe objektivitet dukë vënë para përgjegjësisë ligjore fajtorët, kushdo qofshin ata. E rëndësishme është të zbulohen motivet e vërteta, gjë që që kërkon hetim të plotë dhe të gjithanshëm.

Pak ditë na ndajnë nga zgjedhjet parlamentare të datës 25 Qershorit. Akte të tilla, të dënueshme jo vetëm nga ligji por edhe nga opinioni i gjerë shoqëror, deri në një farë mase, cenojnë atmosferën zgjedhore, fushatën në vazhdim që për këto zgjedhje parlamentare, në përgjithësi ka qënë e qetë.

KShH i sugjeron partive politike (subjekteve zgjedhore) dhe në mënyrë të veçantë, përfaqësuesve të tyre që propogandën t’a bëjnë në përputhje me nenin 78, të Kodit Zgjedhor që kërkon ndër të tjerash, zhvillimin e saj në mënyrë të ligjshme.

Gjuha e urrejtjes nxit dhunën, ndikon negativisht në mbarëvatjen e zgjedhjeve të lira, të ndershme dhe të standarteve që kërkohen. Edhe pesë ditë na ndajnë nga përfundimi i fushatës zgjedhore, e cila sipas Kodit Zgjedhor përfundon 24 orë para datës së zgjedhjeve. Çdo deklaratë e përfaqësuesve të partive apo subjekteve zgjedhore duhet të shmangë përdorimin e gjuhës së urrejtjes si dhe të jetë në respektim të plotë të parimeve të rendit kushtetues, i cili mbrohet në mënyrë të veçantë edhe nga legjislacioni ynë penal.