Në datën 15 Shkurt 2018, Komiteti Shqiptar i Helsinkit realizoi një monitorim për verifikimin e vendgrumbullimit të mbetjeve buzë lumit Devoll, në fshatin Rreth Tapi, Bashkia Kuçovë. Monitorimi konstatoi pretendimet e shfaqura në median vizive (“Top Channel”, të publikuar në datën 30 Janar 2018).
Në terren rezultoi se vendgrumbullimi i mbetjeve në fshatin Rreth Tapi ishte problematik, pasi atje depozitohen mbetje të llojeve të ndryshme (madje groposen edhe kafshë të ngordhura), ndodhet afër një zone të banuar me 2700 banorë të grupmoshave të ndryshme, si dhe vetëm 15-20 metra pranë Lumit Devoll. Plastika, materiale qelqi, sintetike, inerte dhe mbetje të shumëllojshme ishin të përhapura në shtrirje të gjerë sipërfaqësore dhe të shtresëzuar, duke qenë tregues i një procesi të gjatë kohor i hedhjes së mbetjeve në atë zonë.
Referuar kontakteve të realizuara me autoritetet vendore, në këtë zonë nuk depozitohen vetëm mbetjet e fshatit Rreth Tapi, por edhe ato të fshatrave përreth dhe të gjithë ish-komunave të bashkisë Kuçovë, duke zbarkuar sasi të konsiderueshme të mbetjeve disa herë në ditë. 
Problemi është më shqetësues së sezonin e verës, për shkak të temperaturave të larta, pasi djegia e mbeturinave është më e shpeshtë dhe zgjat deri në 5 ditë, ku së bashku me praninë e shtuar të insekteve përbëjnë rrezik real dhe konstant për shëndetin dhe jetën e banorëve.
Mungesa e miratimit të planit rajonal të menaxhimit të integruar të mbetjeve urbane dhe nevoja për të forcuar koordinimin e organeve politikëbërëse dhe ligj zbatuese, në nivel qendror dhe vendor, janë këmbanë alarmi për domosdoshmërinë e marrjes së masave të shpejta për zgjidhjen e situatës sipas ligjeve në fuqi dhe për mbrojtjen efektive të mjedisit, shëndetit dhe jetës.
Kjo çështje do të ndiqet nga rrjeti i avokatëve të KShH-së, mbështetur financiarisht nga Ambasada Britanike ne Tiranë.