Sipas nenit 52, të Kodit Zgjedhor, deri në dt. 6 Mars 2017, kryetari i Njësisë Vendore duhet të marrë masa që, çdo zgjedhës të njoftohet me shkrim në banesën e tij se, në cilën qendër votimi do të votojë dhe në cilin numër rendor të listës së zgjedhësve është emri i tij.
Komiteti Shqiptar i Helsinkit (KShH), në formë sondazhi ka bërë disa vëzhgime në Bashkitë Kukës, Shkodër, Elbasan, Fier, Gjirokastër, Korçë dhe Tiranë nga ku ka rezultuar se ky njoftim ka filluar me vonesë dhe po ecën ngadalë, gjë që mund të bëjë të vështirë zbatimin e nenit të mësipërm.
Veç sa më sipër, lidhur me publikimin e listave të zgjedhësve, në ndonjë rast si p.sh. në Njësitë Administrative nr. 3 dhe nr. 7, Bashkia Tiranë rezulton që, në muajin Janar dhe Shkurt 2017, ato nuk janë publikuar, siç kërkon neni 51, pika 7, e Kodit Zgjedhor.
Vlen të përmendet gjithashtu se, në Njësitë Administrative nr. 2 dhe nr. 4, Bashkia Tiranë, listat e zgjedhësve ishin vendosur në vende të papërshtatshme dhe që mund të dëmtoheshin nga kushtet atmosferike apo faktorë të tjerë.
KShH mendon se, mangësi të tilla mund të ndikojnë negativisht në mbarëvajtjen e zgjedhjeve.
Kjo është aryseja që, KShH u sugjeron organeve të qeverisjes vendore të zbatojnë me rigorozitet detyrat dhe afatet që përcaktohen në Kodin Zgjedhor.
