Komiteti Shqiptar i Helsinkit(KShH) e ka ndjekur këtë çështje gjyqësore në kuadër të projektit “Së bashku me juristët e rinj të përkushtuar për të mbrojtur të drejtat e njeriut dhe për të luftuar rastet e mashtrimit dhe korrupsionit” i mbështetur financiarisht nga Ambasada Britanike në Shqipëri.

Ditën e djeshme, dt. 30 Korrik 2019, Gjykata Administrative e Shkallës së Parë Tiranë shpalli vendimin për detyrimin e Spitalit Universitar Shefqet Ndroqi Tiranë për shpërblimin e dëmit pasuror dhe jo pasuror, në shumën rreth 1,440,000 Lekë, në favor të shtetasve A.L dhe L.L të cilët kërkonin konstatimin e shkeljes së të drejtës së jetës ndaj të ndjerit L.L, për shkak të mos diagnostikimit të të sëmundjes ose mjekimit të pakujdesshëm me pasojë vdekjen. Kjo çështje gjyqësore është përfaqësuar nga avokati Z. Armand Sokoli kuadër të litigimit strategjik  që synon të krijojë praktika pozitive të mbrojtjes gjyqësore të të drejtave të shkelura të qytetarëve në nevojë.

Si është ndjekur ky rast gjyqësish nga KShH?

Pas marrjes së ankesës nga qytetarja A.L pranë zyrave të KShH, fillimisht u asistuan familjarët e të ndjerit L.L, duke i dhënë këshillimin ligjor për ndjekjen e rastit, si dhe në asistimin në ankimin e realizuar pranë Urdhrit të Mjekut të Shqipërisë. Pas kësaj faze u vijua me përfaqësimin gjyqësish të palës paditëse duke iu drejtuar Gjykatës Administrative me kërkesë-padi me anë të së cilës kërkoi konstatimin e shkeljes së të drejtës së jetës. Kjo betejë e KShH së bashku me familjarët e të ndjerit ka filluar ne muajin Mars 2018 duke u finalizuar me  rivendosjen e një të drejte dhe një interesi të ligjshëm që u ishte shkelur familjarëve të të ndjerit, por gjithashtu do të shërbejë si një praktikë pozitive edhe për çdo qytetar të cilit i janë shkelur të drejtat në procedurat dhe protokollet mjekësore të ndjekura nga një institucion spitalor, duke sjellë pasoja të rënda apo të pariparueshme në shëndet deri në humbjen e jetës.