Komiteti Shqiptar i Helsinkit (KShH), zhvilloi takime dhe anketime sipas kampionimit me gazetarët në tetë qytete ne vend. Qëllimi i këtyre anketimeve ishte që të vëzhgonte respektimin dhe zbatimin e Kodit të Punës nga punëdhënësit në sektorin e mediave. Anketimi u krye në Vlorë, Durrës, Tiranë, Elbasan, Gjirokastër, Lezhë, Shkodër dhe Kukës.
Nga përgjigjjet e dhëna, duke respektuar anonimitetin dhe konfidencialitetin, nga vetë gazetarët konstatohet se ata shpesh punojnë pa kontrata pune e vazhdojnë të mos kenë të plota pushimet vjetore por vetëm 14 ditë nga 4 javë, siç e parashikon Kodi i Punës. Në fare pak media respektohet e drejta për 4 javë pushime vjetore. Gazetarëve u paguhet një pjesë e rrogës në bankë. Shpesh rroga u paguhet nga punëdhënësi në dy forma: cash në dorë ose në formën e honorareve, duke cënuar pagesën e rregullt të sigurimeve shoqërore e shëndetësore. Një gazetar lokal, pasi u pushua nga puna kërkoi të drejtat e tij dhe nisi përpjekjet për të zgjidhur çështjen në gjykatë. Por ai u kërcënua nga punëdhënësi dhe për këtë shkak ai e kallzoi në polici. Gazetari pas konfliktit me punëdhënësin u tërhoq nga denoncimi, por nuk dorëzoi padi gjyqësore edhe u largua nga qyteti ku jetonte.
Në një rast tjetër, një gazetar, gjatë kohës së anketimit, u pushua nga puna pas kërkesës së tij dhe të kolegëve për të marrë rrogën në kohë dhe jo me vonesa. Vonesa në pagesën e rrogave u vu re si fenomen ne disa media, ndërsa rezulton se asnjëra prej tyre nuk është paditur për këtë shkelje. Në njërën nga këto media gjatë kohës së anketimit gazetatarët të cilëve iu ishte shkelur e drejta për pagesë në kohë, nënshkruan një peticion dhe kjo solli largimin e menjëhershëm nga puna të njërit nga gazetarëve, që kishte nisur këtë proces. Gazetari nuk ngriti padi gjyqësore pasi nuk kishte besim se do e fitojë përballjen me pronarin në gjykatë.
Të anketuarit arsyetojnë se kjo situatë e veshtirë shkaktohet dhe nga mungesa e kontrolleve nga Inspektoriati i Punës dhe mungesa e kontrolleve të Drejtorisë së Tatimeve për pagesat fiktive që deklarohen në sistemin bankar.
Këto anketime u realizuan në kuadër të projektit “Mbështetje për median e pavarur në Shqipëri”, financuar nga Ambasada Britanike (nëntor 2018-shkurt 2019) i cili synon gjithashtu të ofrojë asistencë ligjore falas për mbrojtjen ligjore të drejtave të punës së gazetarëve.
