Në Fshatin Visokë të Bashkisë Mallakastër banojnë 400 familje, me rreth 1200 banorë. Ky fshat nuk ka patur historikisht ujësjellës. Ujin e pijshëm, banorët e siguronin në mënyra të ndryshme nga zonat përreth, qoftë duke e transportuar edhe me bagëti.
Duke marrë shkas nga informacionet e pasqyruara në media, si dhe në kuadër të nismës për mobilizimin e e banorëve të Visokës për të kërkuar të drejtat e tyre sa i takon marrjes së shërbimit publik të furnizimit më ujë të pijshëm dhe për t’i dhënë fund ndotjes së ujit, tokës dhe ajrit, në dt. 10 shkurt 2017, ekspertë të KShH-së dhe të institucionit të Avokatit të Popullit zhvilluan një monitorim në Fshatin Visokë, Njësia Administrative Qendër Dukas, Bashkia Mallakastër.
Sipas thënieve të banorëve, uji i puseve që ata përdorin edhe si ujë të pijshëm nuk është i pastër dhe i sigurtë dhe nuk i është nënshtruar analizave, fakte këto që mund të jenë me pasoja të rënda për jetën dhe shëndetin e tyre. Ata deklaruan gjithashtu se, kanalizimet e ujërave të zeza të fshatit përzihen me ujërat nëntokësore të puseve. Përveç këtyre, Fshati Visokë ndodhet në zonë naftëmbajtëse ku vihet re prania e puseve të shfrytëzimit të naftës si dhe ndjehet era e rëndë e gazit dhe naftës.
Shkolla 9 Vjeçare, me 120 nxënës si dhe Kopshti që ndiqet nga 25 fëmijë në këtë njësi administrative, furnizohen me ujë për plotësimin e nevojave të higjenës (jo si ujë i pijshëm) nga një zonë kufitare me fshatin. Ndërsa, për nevoja të ujit të pijshëm gjatë procesit mësimor, fëmijët dhe personeli i shkollës e sillnin ujin me shishe plastike. Gjatë stinës së verës, sigurimi i ujit të pijshëm për plotësimin e nevojave të banorëve bëhet edhe më i vështirë.
Banorët, siç u shprehën, ishin të zhgënjyer nga partitë politike që u kishin premtuar zgjidhjen e këtij problem ndër vite, por në fakt asgjë nuk ishte bërë në këtë drejtim dhe jeta e këtyre banorëve nuk është përmirësuar sadopak lidhur me këto shqetësime. Ata kritikuan gjithashtu edhe organet shtetërore që ishin treguar indiferentë për këtë problem që ata kishin ngritur shpesh herë.
KShH vlerëson se, gjëndja është e rëndë pasi mungesa e ujit të pijshëm dhe pretendimet e banorëve për ndotje mund të prekin apo cenojnë shëndetin dhe jetën e tyre. Kjo situatë që prej vitesh nuk ka gjetur zgjidhje kërkon kujdes të veçantë për të parandaluar pasojat e dëmshme në shëndetin e banorëve, të cilat mund të jetë edhe të parikuperueshme. Për këtë arsye, KShH u sugjeron organeve shtetërore përgjegjëse, përfshirë edhe ato të kujdesit shëndetësor që, të vlerësojnë me përparësi këtë çështje dhe të marrin masa për zgjidhjen e problemit.
KShH është e angazhuar për ndjekjen e çështjes, duke përfaqësuar banorët për të ushtruar të gjitha mjetet ligjore, administrative apo gjyqësore në emër të tyre, për të detyruar organet publike përgjegjëse, për të zgjidhur e adresuar shqetësimet e këtyre shtetasve.
Ndjekja dhe përfaqësimi ligjor i kësaj çështje është mbështetet financiarisht nga Fondacioni Shoqëria e Hapur për Shqipërinë (OSFA).
