Komiteti Shqiptar i Helsinkit (KShH) nën kuadrin e nismës “Unë marr pjesë! Zëri im, vota ime vlen!”, financuar nga Bashkimi Europian dhe zbatuar në partneritet me Instituti i Studimeve Politike dhe Civil Rights Defenders, po angazhohet në monitorimin e procesit zgjedhor për Zgjedhjet Parlamentare të datës 25 prill 2021 në qytetet Tiranë, Durrës, Shkodër, Kukës, Vlorë, Fier, Korçë, Gjirokastër dhe Elbasan.

Komiteti Shqiptar i Helsinkit u bën thirrje të interesuarve, studentë apo të sapodiplomuar, me banim në bashkitë e mësipërme, që dëshirojnë të angazhohen si vullnetarë në procesin e monitorimit të ditës së votimit dhe ditës së numërimit, të shprehin interesin e tyre.

Të interesuarit duhet të jenë në vitin e fundit apo të kenë përfunduar studimet Bachelor, ose të jenë në proces/të kenë mbaruar studimet Master, në fakultetin e Drejtësisë apo të Shkencave Sociale. Ata nuk duhet të jenë anëtarë të partive politike, vëzhgues të subjekteve zgjedhore apo të përfshirë në ndonjë veprimtari me natyrë politike.

Personat e përzgjedhur do të plotësojnë një Formular Vetëdeklarimi ku mbajnë përgjegjësi ligjore nëse rezulton se disponojnë kriteret penguese të parashikuara në paragrafin më lart. Formulari do të plotësohet dhe do të dërgohet i plotësuar në adresën e zyrave të Komitetit Shqiptar të Helsinkit.

Angazhimi si vëzhgues në ditën e votimit dhe numërimit është vullnetar dhe nuk përfshin shpërblim financiar, por do të mbulohen shpenzimet ditore të ushqimit.

Të interesuarit janë të lutur të dërgojnë një CV dhe një letër për shprehjen e interesit tek adresa office@ahc.org.al deri në datën 19 shkurt 2021.